Watu 12 wauawa shambulio la al-Shabaab Mandera, Kenya

Image copyright Ibrahim Adan Ali / Key FM

Image caption Washambuliaji walirusha vilipuzi kwenye jumba hilo

Watu 12 wameuawa baada ya watu wenye silaha kushambulia nyumba moja ya malazi mjini Mandera, kaskazini mashariki mwa Kenya.

Msemaji wa serikali ya Kenya Eric Kiraithe amesema watu sita wameokolewa kutoka kwenye hoteli hiyo ya Bishaaro.
Wanamgambo wanaoaminika kuwa wa kundi la al-Shabaab walishambulia nyumba hiyo mwendo wa saa tisa unusu usiku. Walirusha vilipuzi kwenye nyumba hiyo kabla ya kuingia ndani na kuanza kuwafyatulia risasi waliokuwemo ndani.
"Sehemu ya jumba iliporomoka, na kuua watu 12. Watu sita wametolewa kutoka kwenye vifusi vya jengo hilo wakiwa hai kufikia sasa," ameandika Bw Kiraithe kupitia mtandao wa Twitter.
Wataalamu wa mabomu wanafanya uchunguzi kubaini ni vilipuzi vya aina gani vilitumiwa kutekeleza shambulio hilo.

Image caption Mji wa Mandera unapatikana katika mpaka wa Kenya, Somalia na Ethiopia

Kundi la al-Shabaab limekiri kutekeleza shambulio hilo.
Mji wa Mandera umekuwa ukishambuliwa mara kwa mara na wanamgambo wa al-Shabaab, kundi linalopigana dhidi ya serikali inayoungwa mkono na Umoja wa Mataifa katika taifa jirani la Somalia.
Wanamgambo hao wamekuwa wakishambulia watu ambao si wa asili ya Kisomali.

Image copyright Ibrahim Adan Ali / Key FM

Image caption Maafisa wa usalama nje ya hoteli ya Bishaaro

Mshirikishe mwenzako

Asante kwa kutembelea Blog yetu washirikishe na wenzako, Pia tunaomba maoni yako hapa au tupigie kwa (+255) 0769436440 Karibu Tena

TOA MAONI YAKO HAPA CHINI